Misiolari jesuita, ekialdeko Asian egindako ebanjelizazio lanagatik egin zen ospetsu eta Indietako Apostolu ezizena jarri zioten. Xabierko Gazteluan jaio zen 1506an, gurasoak Joan Jaso –orduan Nafarroako Errege Kontseiluko presidentea– eta Maria Azpilkueta –oso familia noblekoa, Martin Azpilkueta doktore ospetsuaren familia berekoa– izanik. Nafarroa inbaditzen ari ziren Gaztelako tropen aurka borrokatu behar izan zuten Migel eta Joanek, anaia nagusiek, aitak Joan Albretekoa erregeari Irunberriko gotorlekura ihes egiten laguntzen zion bitartean. Frantziskok bere etxean bertan bizi izan zuen Nafarroak erresuma independente gisa izandako azken arnasa.
1525ean Parisera bidaiatu zuen Sorbonan ikasteko. Han aurkitu zuen Inazio Loiolakoa. 1535ean pobrezia eta kastitate-botoak egin zituen, eta geroago Lur Santura joan zen. Apaiz egin zen 1537an. 1541ean Ekialdeko Indiara alde egin zuen eta ebanjelizazio lan handia egin zuen. Goa, Kotxin, Pesqueria uharteak, Malaka, Moluka uharteak, Japonia eta Txinatik pasatu zen. Azken herrialde horretan hil zen 1552ko abenduaren 3an Shang-chuan uhartean. Tradizioak dioenez, agoniaren azken arnasak egitean Xabierren azken hitzak Jainkoari euskaraz egindako otoitza izan ziren.
Iruzkinak. Bota hemen zurea:
0 iruzkin. Gehitu zurea:
Argitaratu iruzkina